"Osidda est una idda prodigiosa
e fizza digna de su continente,
trabagliada e produidi onzi cosa
e abitada este dae onesta zente;
Este modesta, ospitale e generosa,
umile e pro natura intelligente;
no est de sa Toscana invidiosa
ca este de menzusu terrasa possidente.
Ogrilla primu lumene dadu l'ana,
distruttas duas boltas l'an connotta;
Osidda sa secunda zittadella,
de origine e stirpe greciana;
poi sa telza la jamamusu tottu
Osidde sese pro noisi cara e bella.
Turista chi sa vida soddisfaghese,
de girare in tottue ses amante;
girasa dae su Nord a su Levante,
ma si ses archeologo itte faghes?
Benis a Osidde e bides sos nuraghes,
domos de janas e tumbas de gigantes;
costruidos chin massos de granitu,
menzusu de sa piramide d'Egittu."
Nessun commento:
Posta un commento